Падагра — распаўсюджаны тып запаленчага артрыту. Яе сімптомы — раптоўныя, інтэнсіўныя прыступы болю, ацёкі, пачырваненне і боль уў адным або некалькіх суставах. Падагра звычайна закранае сустаў вялікага пальца на назе. Аднак гэтая хвароба можа пашкоджваць яшчэ некалькі суставаў, напрыклад, калені, шчыкалаткі, ступні, рукі, запясці і локці. Перыяды, калі сімптомы пагаршаюцца, называюцца абвастрэннямі, а рэмісія азначае перыяды, калі сімптомы не праяўляюцца. Калі абвастрэнні падагры ўвесь час паўтараюцца, яна можа перайсці ў падагрычны артрыт. Пры гэтым тыпе артрыту стан хворага пагаршаецца з цягам часу.
Падагра — вынік захворвання, вядомага як гіперурыкемія. Пры ім у арганізме зашмат мачавой кіслаты. Мачавая кіслата ўтвараецца ў арганізме пры расшчапленні пурынаў. Гэтыя злучэнні прысутнічаюць як у самім арганізме, так і ў ежы, якую мы спажываем. З-за празмернай колькасці мачавой кіслаты ў суставах, вадкасцях і тканках арганізма ўтвараюцца крышталі мачавой кіслаты. Аднак падагра развіваецца не ў кожнага, хто мае высокі ўзровень мачавой кіслаты. Тым, у каго сімптомаў няма, лячэнне звычайна не патрэбна.
Па некаторых ацэнках, ва ўсім свеце як мінімум 53 мільёны чалавек маюць дыягназ падагра. Шмат каму з іх не быў пастаўлены правільны дыягназ, і толькі менш за палову атрымліваюць лячэнне прэпаратамі, што зніжаюць узровень мачавой кіслаты.
За апошнія 30 гадоў колькасць людзей з падаграй павялічылася з 22 мільёнаў да 53 мільёнаў. Таксама вырасла і колькасць новых выпадкаў.
Лячэнне падагры часта ўключае як купіраванне сімптомаў (зняцце болю) падчас абвастрэння, так і спажыванне меншай колькасці прадуктаў і напояў, у якіх шмат пурынаў. Каб лепш купіраваць сімптомы і прадухіляць будучыя абвастрэнні, урачы могуць прызначаць НПЗП, калхіцын, корцікастэроіды і прэпараты, якія зніжаюць узровень мачавой кіслаты, напрыклад, алапурынол або фебуксастат.