Стэнакардыя, або стэнакардыя напружання, — гэта часовая форма дыскамфорту ў грудзях, якая ўзнікае падчас фізічнай актыўнасці або эмацыянальнага стрэсу. Пры гэтым захворванні сэрца не атрымлівае дастатковай колькасці кіслароду з-за абмежаванага крывацёку праз каранарныя артэрыі. Прычынай можа быць звужэнне артэрый з-за атэрасклерозу або ў выніку спазмаў каранарных артэрый.

Хворыя на стэнакардыю звычайна адчуваюць ціск, сцісканне або цяжар у грудзях, але гэтыя сімптомыу таксама могуць прысутнічаць ад сківіцы або зубоў да лапатак або на руках да запясцяў і пальцаў.
Сімптомы звычайна праяўляюцца або пагаршаюцца ў сітуацыях павышанай фізічнай актыўнасці, напрыклад, пры хадзьбе ўгару, супраць моцнага ветру або ў халоднае надвор'е, і паляпшаюцца падчас адпачынку праз некалькі хвілін.

Стэнакардыя бывае некалькіх тыпаў. Два найбольш распаўсюджаныя з іх — стабільная і нестабільная стэнакардыя. Стабільная стэнакардыя сустракаецца часцей за ўсё. Яна ўзнікае падчас фізічнай нагрузкі. Прыступы праходзяць пасля адпачынку або прыёму лекаў ад стэнакардыі. Звычайна яны доўжацца не больш за пяць хвілін.
Нестабільная стэнакардыя — больш сур'ёзная форма захворвання, якая патрабуе неадкладнай медыцынскай дапамогі. Нестабільная стэнакардыя мае менш устойлівы характар. Прыступы могуць адбывацца нават падчас адпачынку ці меншай актыўнасці, чым звычайна. Нестабільная стэнакардыя больш інтэнсіўная. Прыступы часта доўжацца больш за 5 хвілін і не праходзяць нават пасля адпачынку або прыёму лекаў ад стэнакардыі. Без належнага крывацёку сэрца не атрымлівае дастатковай колькасці кіслароду, што прыводзіць да сардэчнага прыступу. Нестабільная стэнакардыя ўяўляе значную рызыку і патрабуе неадкладнага медыцынскага ўмяшання.

Вырашэнне праблемы, што з'яўляецца прычынай асноўнага захворвання сэрца — частка лячэння стэнакардыі. Мэта — паляпшэнне крывацёку і зніжэнне колькасці ўскладненняў. Такое лячэнне можа ўключаць выкарыстанне антыкаагулянтаў з мэтай прадухіліць утварэнне тромбаў, лекаў ад ціску і халестэрыну, спецыяльных лекаў ад стэнакардыі, змены ў ладзе жыцця, а таксама празскурныя і хірургічныя ўмяшанні.